[2018 北朝鮮] 鴨仔團有咩睇－LIFE is a JOURNEY

呢篇就黎講吓其實黎到北朝鮮有咩睇..
北朝鮮嘅團，大部分都係一樣，都係睇果D。
但今次嘅遺憾係...冇得去萬壽臺大紀念碑！！！！！！！所以我冇得同金仔老豆同金仔阿爺嘅銅像影相
淨係喺車都經過當睇咗=0=

（呢張係喺參觀完萬壽台噴泉公園離完咁影咗張）

第一日基本上到埗後食個晚飯就返酒店，所以都冇咩特別景點。正正式式睇野都係由第二日開始。

第二日一早就坐咗差唔多三個鐘頭車去到妙香山。
第一個景點就係國際友誼展覽館，簡單Ｄ黎講就係全世界Ｄ人送俾北朝鮮嘅野就係擺咗係到...
但裡面係唔影得相..所以阿金仔收到D咩，係冇相睇架

（呢個就係入口）

入到去，你係要擺低哂所有野..除咗D貴重野...
然後大家就去個廁所，然後有專人帶住你去行...
個展覽館幾大嘅，分咗唔同展館，分別由唔同洲份、國家、地區黎區分。我地今次睇嘅只係可以睇亞洲區同一個集合咗全世界紀念品嘅一間房。
其實..我都唔知自己睇咗乜...都係果D畫、擺設、雕塑、碗、碟、瓷器...
一路行，就有個人一路講，但好明顯我係冇聽佢講架，因為聽咗都唔記得，又冇咩得着。

勁快咁行完個擺全世界紀念品嘅房，然後就行亞洲館。其實都唔係咩亞洲館，主要係帶我地睇中國館....
但中國館又有咩好睇呢!?咪又係D山水畫、有金仔老豆、金仔阿媽同金仔阿爺嘅樣係上面嘅瓷器，有正常Size同有D人咁高嘅碟=0=
其實間唔中都會見到D由香港送過去嘅禮物，但我大鄉里出城，除咗英皇集團係知係咩之外，其他由香港送過去嘅都唔知係咩公司。
然後勁好笑係，因為成團得我同我個FD係香港人,...阿導遊妹妹醒起我係香港黎，見到個由香港送過黎嘅禮物(一塊寫咗字嘅野)，就叫我去讀上面D字。
咁我咪讀囉，用廣東話讀，結果成團大陸人緊係冇人明我UP乜春，但是但啦，我係唔會好普通話讀架:)

然後繼續趕鴨仔咁睇..基本上就係一路行一路睇，都冇停過咁就行去，然後上到去二樓一個室外平台咁嘅地方，就可以坐低，影吓相。但其實冇咩好影

(平台望出去就係咁)
HEA完又入返去室內，行個紀念品店，冇乜野買就離開呢到。然後坐車去一樣喺妙香山嘅普賢寺。

普賢寺呢個地方係幾靚嘅，再加上我地去嘅時候係秋天，又有紅葉咁睇吓，係有加分。

(其實講到寺廟，真係同中國嘅冇咩分別，所以係會見到繁體字)

(港囡見到紅葉係一定要影)

參觀完普賢寺就去食LUNCH，食完LUNCH就坐車返平壤。

返到平壤嘅景點就係中朝友誼塔。(from wiki: 為紀念1950年中國人民志願軍支援朝鮮戰爭9週年，紀念為之戰死的軍人而建立。 )
呢個景點...我真心反哂白眼。因係每一個人係必需俾錢買花黎獻花。每一札係20蚊人民幣!!!!

(就係呢札花，仲要睇得出係循環再用）

買完花，阿導遊姐姐就黎主持個儀式，就係一齊向住個塔黎個三躹躬，然後獻花。
獻完花就入去個塔裡面睇，但其實冇咩睇，裡面嘅係壁畫，畫返朝鮮戰爭嘅畫面。

（塔裡面嘅一盞吊燈）

（係中朝友誼塔望出去嘅平壤市）

好快睇完又俾人趕上車，因為我地要趕入黑前睇哂今日要睇嘅景點。

之後再黎就係凱旋門，佢地聲稱呢個係全世界最大嘅凱旋門。
呢個景點係只有遠觀，冇得行入去架！基本上係落車，影幾張相，然後又俾人趕上車。

好，下一個！建黨紀念碑！
呢個景點有誇張，我只係落咗車１分鐘都冇就俾人趕返上車。

點解呢..係因為唔知點解有一堆軍人黎咗呢到集合，好似唔知有咩活動咁，所以導遊一見到有軍人黎，即將趕咗我地上車。

然後就去到金日成廣場

金日成廣場即係等於北京嘅天安門廣場，但老賓講，天安門廣場大好多，氣勢強好多。呢個就好似一個迷你版嘅天安門廣場咁。
去到呢個景點，攝影師叔叔又好熱心咁幫我地影相=0=

（係金日成廣場後面見到嘅主體思想塔）

（附送朋友偷影同團大媽見到夕陽嘅心情）

呢到完咗我地就去第二日最後一個景點—萬壽台噴泉公園
其實我唔知睇黎做乜...呀..是但啦，黎到咪影張囉...

就係咁，就完咗第二日嘅景點。

之後就黎到第三日
晨咁早又搭三個幾鐘車，今次係去板門店。

(真係晨咁早...大霧到頂都見唔到。呢間就係我地住嘅羊角島酒店)

（離開咗平壤就係咁嘅樣，係香港永遠都見唔到嘅景）

去到板門店，落車，先去到一個入口嘅地方，去廁所，然後唔知點解會買咗紀念品先，買完就去紀念品店隔離嘅一間房聽一個介紹。
聽完就要２人平排咁排隊，準備進入南北韓非軍事區。旅遊巴先入閘，然後到我地行入閘，行入閘後先可以上返旅遊巴。

係板門店參觀，每一次行都要排隊，但行行下成條隊就會散哂...