LIFE is a JOURNEY

黎到第二篇，可能大家都以為入戲肉啦
少年，你太年輕了
因為第一日基本上都係移動

從香港出發到坦桑尼亞，我選擇了Qatar，要轉一次機，在多哈
夜晚7點25分機，4點幾就到機場check in
Check in正常順利，係counter除咗check機票Passport，仲要check埋針紙
入到禁區，唔好諗住有街行，因為Covid關係，機場9成嘅店舖都閂咗，包括餐廳
而幸好係GATE6X附近有間餐廳係開嘅（其實我一早上機場個網睇咗有咩餐開，只係咁啱真係喺我上飛機嘅閘口附近）
成個機場都冇咩人，幾靜幾舒服😌
係餐廳食咗個Carbonara 同飲咗支可樂

食完就慢慢行去閘口等
而當我以為而家搭飛機由香港出發一定唔多人啦
真係「少年，你太年輕啦」，當成個世界都BACK TO NORMAL，所以係有勁多人轉機架
結果我班機當然係勁多人啦

咁耐冇飛，真係要影返張留念，人生第一次飛多哈，第一次搭QATAR～仲愈飛愈遠～

長途機必揀嘅走廊位，呢一程飛多哈，9個幾鐘，雖然最後好似早到咗

久違嘅飛機餐～但上面兩兜勁難食，飯就OK
坐到條腰真係就黎斷，終於都落機，到達多哈機場
因為本身轉機時間有成3個鐘，再加上飛機早咗到，所以有勁充裕嘅時間轉機
多哈機場都係一個勁繁忙嘅機場，勁多人轉機
一落機，要過一次海關，先可以去轉機
而話說，係香港上機前，我特登去咗裝水上機飲，咁最後我一啖都冇飲到啦
咁黎到過海關，見到前面D人係咁扔水樽，即刻諗起我樽水
因為我係用自己水樽，冇得扔咗去，結果我係過海關前飲咗成公升水
過完海關就即刻去揾轉機閘口，但其實我仲有勁多時間

多哈機場一樣有無人駕駛列車去登機閘口，因為我要去嘅閘口都係老練咁遠，可以順便搭下
去到登機閘口都係等，而由於飲咗成公升水，係我等上機期間，我去咗4-5次廁所LoL
之後都係上機， 第二程機就由多哈到坦桑尼亞機場，5個幾鐘，因為上機嘅時候已經係凌晨2點幾
所以上機冇耐，就瞓咗
差唔多到嘅時候，機師開咪，同大家講左手邊大家可以睇到Mount Kilimanjaro
Mount Kilimanjaro係非洲最高嘅山
因為我唔係坐窗口位嘅關係，我又冇expect過坐飛機會睇到
當我嘗試向窗口望，向下望，乜都見唔到
我仲同坐窗邊嘅非洲人double confirm係咪真係睇到，咁佢又話係
然後中間行有無非洲女士遞部電話埋黎話可唔可以幫佢拍片影一影Mount Kilimanjaro
坐窗邊果位非洲人問佢，乜你唔係非洲人黎架咩？你都要影？
然後阿女士話，我影完要擺上TikTok（我：=0= ）
然後坐前一排走廊中間果個又拎部手機過黎話幫佢影
咁我見大家都咁雀躍要影，咁我又影啦
結果...我影到咁

我真係盡咗力架啦～
就係咁，架機嘅人個個行埋左邊睇山
睇咗5-10分鐘，大家都睇完
又差唔多要降落～
就係咁，就到咗Kilimanjaro International Airport，正式踏入咗非洲！！！！

我班機，就係泊係到，然後直接行入機場

呢張相就係我排緊隊CHECK文件嘅時候影，雖然話係國際機場，但都係好細
係過海關之前，佢會檢查咗齊文件先會放你入去
當中包括PASSPORT，COVID針紙，同埋黃熱病張針卡
齊嘅就會入室內過海關
因為我做咗E-Visa，所以填埋張入境表就得
而海關果到都有Counter可以申請落地簽證

就係咁，就順順利利入咗境，係機場出面揾到司機，咁就出發lu~~~

下篇見！